Viktige brikker er i ferd med å falle på plass når det gjeld ei formell ordning for Grobygget og ei revitalisering av dette.
Etter at ei gruppering kom på bana i samband med at kommunen ville rive den tidlegare tekstilfabrikken, har det vore jobba mot å finne ei løysing som kan gagne både kommunen og dei som ønskjer å ta i bruk bygget. Sistnemnde jobbar også med å etablere ei foreining for å sikre ei meir formell organisering av brukarane.
Administrasjonen i Hornindal kommune går no inn for at det blir laga ein langsiktig leigeavtale med foreininga. Det er i dag ein festeavtale på eigedomen, mellom kommunen og Helga Kirkhorn, og denne går heilt fram til 2065. Det skal derimot ikkje vere noko i vegen for at kommunen leiger ut til annan part.
- Ikkje for store økonomiske forpliktingar
I følgje saksutgreiinga skal sjølvkostprinsippet leggjast til grunn slik at kommunen korkje skal ha inntekter eller utgifter på ein slik avtale.
- Leigesummen vil vere av ein slik storleik at det skal kunne vere mogleg for foreininga å gå inn på ein slik avtale utan at dei økonomiske forpliktingane til husleige vert for store, heiter det i saksutgreiinga.
I utkastet til leigeavtale er det lagt til grunn følgjande prinsipp:
- Leigeobjektet vert utleigd «som det er»
- Utleigar er ikkje ansvarleg for at leigeobjektet er i samsvar med byggtekniske krav som gjeld objektet
- Leigetakar syter for all renovering for eiga rekning
- Leigeobjektet skal berre nyttast til utleigeverksemd
- Utleigar kan krevje marknadsleige for leigeobjektet
- Leigetakar har gjort seg kjend med reguleringsplanen for eigedomen
- Det vert ikkje fastsett ordinær husleige. I staden skal leiga vere basert på sjølvkostprinsippet. I denne samanheng betyr det at leiga skal dekke festeavgift, forsikring av bygget, kommunale avgifter og løpande vedlikehald. I tillegg skal leigetakar betale straum, internett, reinhald med vidare.
Framlegg til leigeavtale skal handsamast i utvalet for Utvikling denne veka, og vidare i formannskap og kommunestyre i byrjinga av neste veke.