Denne veka var LOs Sommarpatrulje på besøk hos ungdommar tilsette i Stryn og Hornindal.
– Det viktigaste for oss er at unge arbeidstakarar skal få eit godt førsteinntrykk av arbeidslivet, seier ansvarleg for LOs Sommerpatrulje i Sogn og Fjordane, Øyvind Møller.
Saman med 20 andre engasjerte unge patruljerer han arbeidsplassar i fylket i sommar.
Gode resultat
Hos Hagen AS i Stryn var alt på stell då Øyvind Møller var på besøk.
– Her gjer dei ein god jobb, seier Møller. Ofte får sommarhjelpene dårleg opplæring i HMS, men her er dei flinke til å følgje opp det også. Møller skryt av å partulere eitt av dei betre fylka i landet.
– Sogn og Fjordane er generelt veldig bra, betre enn landssnittet, seier han.
I fjor braut om lag 20 prosent av dei Sommarpatruljen besøkte i Sogn og Fjordane reglane i Arbeidsmiljølova, men det er stort sett ikkje snakk om alvorlege brot. Resultatet ligg an til å hamne på om lag det same i år også.
Reiselivsnæringa dårleg rykte
Turistnæringa har vore kjend for å ikkje ha dei beste arbeidstilhøva, men Møller kan fortelje at det også her er gode forhold for ungdommane i Stryn kommune.
- Turistsesongen er tøff, og det er ei lågtlønna næring, men tilhøva har kome seg veldig i den bransjen også, fortel han. Til no har det vore upåklageleg her i kommunen.