Om du tykker du har sett fleire bubilar og campingvogner på vegane i år enn før, så tek du neppe feil. Fleire campingplassar i fylket melder om rekordbesøk. Tendensen begynte å vise seg allereie i mai, seier reiselivssjefen for Visit Nordfjord, Marita Lindvik.
Mot nye høgder
– Det er jamnt gledelege tal og gode belegg allereie etter mai månad. Det som skil seg ut er ei stor auke i talet av camping- og hytteturistar, seier Lindvik.
– Ei totalauke på 9,5 prosent i Nordfjord. 5,5 prosent av desse er det nordmenn sjølve som står for. 30,7 prosent er det utanlandske turistar som står for, forklarar ho.
Reiselivsjefen presiserar at desse tala gjeld for mai, samanlikna med mai i fjor. Ho registrerar merkbart mykje turistbesøk både i juni og juli.
– Det er ingen tvil om at vi går mot nye høgder, seier ho.
Fleire årsakar til besøksauke
Lindvik har nokre svar på kvifor fleire vel å legge ferien sin til Norge og kvifor nordmenn sjølve vel å feriere i eige land.
– Norske reisemål, spesielt på Vestlandet, er veldig godt marknadsført. Det er blitt høg etterspurnad spesielt på aktive opplevingar, helst i spektakulære omgjevnadar som Nordfjord har rikeleg av, forklarar Lindvik. Ho legg til at urolige tider i deler av verda har ført til at fleire attraktive utanlandske reisemål ikkje er like aktuelle i år.
– Norge og Skandinavia blir rekna som trygge reisemål, poengterer Lindvik.