I mangel av asyltilstrøyming til Norge har UDI beslutta å legge ned 7000 mottaksplassar i Norge. Stryn statlege mottak i Innvik stenger dørene 30. november etter eitt år med drift.
- Korleis vil Norsk Mottaksdrift karakterisere samarbeidet med Stryn som vertskommune for asylmottak?
- Mottaket i Stryn vart opna då tilstrøyminga av asylsøkjarar til Norge var på det høgste i fjor haust. Det vart gjort eit fantastisk stykke arbeid av tilsette på mottaket og i Stryn kommune for å ta i mot asylsøkarane som raskt kom til mottaket, seier regionleiar i Norsk mottaksdrift AS, Ronja Trolie.
Takksam
Regionleiaren er takksam for måten Stryn har fungert som vertskommune.
– Eg vil spesielt rose skular, barnehagar og helsetenestene i kommunen. I tillegg har naboar, frivillige, lag og organisasjonar vore aktive i å skape gode buforhold rundt mottaket, og det er vi veldig takksame for, seier Trolie.
Honnør til bygdefolket
Ordførar i Stryn, Sven Flo, seier kommunen har tilrettelagt etter beste evne. Flo rettar ein stor honnør til bygdefolket i Stryn.
– Vi var særs kritiske til prosessen rundt etableringa av asylmottak i Stryn. Når mottaket likevel kom så har vi gjort det vi kunne for å tilrettelegge best mogleg. Det har vore gjort ein kjempejobb, og eg vil framheve skule og helsetenestene spesielt. All honnør til bygdefolket som har teke godt imot dei, seier Flo.