Forhandlingsutvala er einige om nytt storfylke. Namnet blir Vestlandet, språket nynorsk. No står det att for fylkestinga i Hordaland og Sogn og Fjordane å seie ja eller nei.

Bergen vert administrasjonssenter for den nye regionen og sete for rådmann og politisk leiing. Den nye regionen får nynorsk som administrasjonsspråk og statleg tenestespråk. Forhandlingsutvala er samde om at namnet på den nye regionen, som får om lag 630 000 innbyggjarar, vert Vestlandet.

Veg og kultur

Intensjonsplanen, som vart underteikna tysdag, inneber at den administrative leiinga for vegsektoren og kultursektoren skal liggje i Sogn og Fjordane, medan Hordaland får det administrative ansvaret for opplæring og idrett (som er samla i ein sektor) og kollektivtransport.

Næring vert delt i to, med to likestilte sektorleiarar med ansvar for kvart sitt av dagens fylke.

Delt i to

Sektorleiaren for opplæring skal sitje i Hordaland, men plan- og strategiansvaret for sektoren vert delt i to.

Hordaland får ansvaret for den vidaregåande opplæringa i bergensområdet, medan dagens Sogn og Fjordane får ansvar for resten av regionen. Intensjonsavtalen legg opp til tilsvarande deling av plan- og strategiansvar for kultursektoren og vegsektoren.Dei to forhandlingsutvala legg også til grunn at fylkesmannsembetet skal leiast frå Sogn og Fjordane, med desentralisert forvaltning i begge dagens fylke.

Eige fond

Intensjonsplanen opnar for at Sogn og Fjordane kan eit eige investerings- og disposisjonsfond. Dersom fylkeskommunen vel å gjere dette, kan heile utbytet frå Fjord1-salet og det fylkeskommunen måtte ha av aksjeverdiar i SFE/SF Holding plasserast i dette fondet.

– Eg er spesielt nøgd med at vi har fått til eit eige Sogn og Fjordane-fond, der også SFE-aksjane skal liggje, og at vi får eit strategisk ansvar for den vidaregåande opplæringa i distrikta. Vi er gode på opplæring i Sogn og Fjordane, og det skal vi ta med oss vidare, seier Jenny Følling. Fylkestinget i Sogn og Fjordane skal handsame planen 2. februar og fylkestinget i Hordaland dagen etter.

Dette seier fylkespolitikarane om intensjonsplanen:

– Venstre seier ja, seier gruppeleiar Gunhild Berge Stang i Venstre til Fjordingen.

– Senterpartiet si fylkestingsgruppe har ikkje handsama saka enno. Likevel er det ingen hemmelegheit at vi ikkje støttar reforma, og vi røysta mot den førre avtala. Mitt utgangspunkt er at Sp meiner at Sogn og Fjordane skal halde fram som eige fylke, då det tener inn- byggjarane best, seier fungerande gruppeleiar Aleksander Øren Heen i Senterpartiet.

– Frp har ikkje hatt gruppemøte enno, så vi veit ikkje om vi kjem til å stemme for, seier Frank Willy Djuvik, gruppeleiar i Frp.

– KrF-gruppa har ikkje diskutert saka ferdig enno, men alt tyder på at vi er positive, seier Trude Brosvik, gruppeleiar i KrF.

– Høgre seier ja til avtalen. Sogn og Fjordane har kome godt ut med omsyn til ansvar, oppgåver og eige fond til investeringas- og utviklingsprosjekt, seier Noralv Distad, fylkesgruppeleiar for Høgre.

- Saka skal sjølvsagt drøftast i gruppa før tingsetet, men eg kjenner meg trygg på at gruppa vil sei ja til intensjonsplanen, seier Åshild Kjelsnes, fylkesvaraordførar og gruppeleiar i Ap.

- MDG går imot. Vi er ikkje imponerte over stolflyttinga deira utan andre ambisjonarut over det, seier Stein Malkenes frå Miljøpartiet Dei Grøne.

Gruppeleiaren frå SV har så langt ikkje respondert på førespurnaden frå Fjordingen.