På Bødalssanden heilt i vasskanten har Åse Evebø slått leir. Her har ho utsikt opp mot Bødalssætra, mot Ramnefjellet og utover Lovatnet.

Sidan juni har ho budd her. Kvar dag drikk ho morgonkaffien ved vatnet, eller i teltet om det regnar, før ho syklar av garde til jobb.

– Det er ingenting som hastar. Eg brukar lang tid på å sykle til Sande for det er så masse å sjå på. Blomar, rev, hjort, fuglar, ramsar ho opp.

Evebø har sommarkontor på Sande camping der ho tilbyr ulike former for behandling, mellom anna aromaterapi, akupunktur, fotsoneterapi, massasje og Bachs blomstermedisin.

Nytter seg av det naturen har å by påEvebø er flink til å utnytte naturen rundt seg. I Lovatnet fiskar ho aure, og rundt teltet vekst det blomar som ho brukar til å krydre opp maten med og til å lage te av. Ryllik, Raudkløver, Ramslauk, Kjerrigrokk, Perikum og Bergmynte, alt kan brukast til mat, ifølgje Evebø.

– Bergmynte er det som vi kallar oregano, det har masse smak i seg. Ramslauksmøret har eg laga sjølv, det veks masse ramslauk ovanfor Sande. Ramslauk vert kalla for Nordens kvitløk, fortel ho.

Ramslauksmør, Raudkløver, Ryllik og Bergmynte set sin smak på fersk aure.

Det starta med at ho tok med seg teltet til Lodalen i fjor sommar, for å bu ei natt eller to ute. Så vart det så bra vêr at ho berre vart liggjande heile sommaren. I år ville ho gjere det same.

Har sett breane vekse og forsvinneEvebø er godt vand til teltlivet. I 20 år har ho jobba med breføring og turguiding i Bødalen. Mange somrar budde ho i telt på Bødalssetra medan ho guida turar på Bødalsbreen. Ho har ein sterk kjærleik til Lodalen.

– Eg har alltid vore veldig glad i Lodalen og har budd fleire somrar på Bødalssætra. Det er jo fantastisk fint her, med fjella, naturen, breane som heng utover fjellhyllene.

Etter 20 år breførar og guide har ho sett breane vekse og forsvinne.

– I fjor var det veldig spesielt. Eg har aldri opplevd Bødalsbreen så liten som då, den har gått veldig tilbake dei siste åra. Eg hugsar på slutten av 90-talet, då vaks breane enormt. Det er vanvittig å tenkje på. Vintrar med masse nedbør og kalde somrar var oppskrifta, så kanskje vi er på rett veg igjen, seier ho.

Fleire burde prøve teltlivetEvebø får ofte spørsmål om kvifor ho bur i telt.

– Mange synest kanskje det er ein litt primitiv måte å leve på og skjønner ikkje kvifor eg gjer det, men eg får så mykje att for det. Det blir meir stas å bu i eit hus etterpå. Eg synest det er veldig fint med sånne kontrastar og ein set meir pris på kvardagslege ting.

Ho er heilt sikker på at det blir fleire somrar i telt i Lodalen. Ho trur fleire ville hatt godt av å leve teltlivet.

– Eg anbefaler det og trur faktisk det ville vore nyttig for mange. Ein kjem inn i ei eiga rytme og det gjer så godt å vere ute i naturen.

Åse Evebø brukar kanoen når ho skal setje ut garn, fiske eller berre ta seg ein kveldstur på Lovatnet.