Verdscuprennet i hopp i Holmenkollen søndag forsvann i tåka og vart avlyst. No har det internasjonale skiforbundet i samarbeid med Norges Skiforbund og Vikersund avgjort at det avlyste rennet vert erstatta med eit ekstra skiflygingsrenn i Vikersund fredag kveld.
- Vi var veldig fortvilte over situasjonen i Holmenkollen søndag ettermiddag, men det var ingen annen mulighet enn å avlyse rennet. Derfor er vi veldig glade i dag for at vi får til denne løsningen med Vikersund, seier arrangementsjef Terje Lund i Norges SKiforbund i ei pressemelding.
Vidare i pressemeldinga heiter det: "Etter hektisk møtevirksomhet søndag og mandag mellom arrangører, FIS tv- og markedsselskaper som eier rettighetene, er det enighet om et ekstrarenn fredag kveld. I praksis betyr dette at kvalifiseringa fredag utgår til fordel for at alle deltakerne automatisk er kvalifisert til 1. omgang. Det nye er at det blir satt opp en 2. omgang som gjør at programmet fredag kveld varer lenger".
Alexander Stöckl, sjef for det norske hopplandslaget, seier til Dagbladet at det er bra at rennet blir gjennomført. Og han meiner det kan vere ein fordel for dei norske hopparane å få ein ekstra konkurranse i Vikersund.
- Dette er veldig bra. Våre gutter elsker skiflyging, seier Stöckl til Dagbladet.
Anders Fannemel sette verdsrekord i skiflyging nettopp i Vikersundbakken i fjor med 251,5 meter. Ettersom det no vert renn i Vikersund både fredag, laurdag og søndag, vert det fleire sjansar til å utfordre verdsrekorden.