Helsesektoren står framfor store utfordringar i åra som kjem. NAV-direktøren i Sogn og Fjordane, Tore Thorsnes, seier til NRK Sogn og Fjordane at ein av tre ungdomar må velje omsorgsyrke for at helsesektoren skal ha nok arbeidskraft i 2035.

I følgje tal frå NAV, presentert av NRK, er nærare 120.000 tilsette innan helse- og omsorgssektoren i Norge over 55 år. Det utgjer nær 23 prosent av alle tilsette i sektoren. Dermed står sektoren framfor store utskiftingar, samtidig som tal eldre aukar. Verken Tore Thorsnes eller andre trur eller meiner at ein tredjedel av dagens unge skal utdanne seg innan omsorgsyrke. Men forgubbinga som kjem utgjer ein enorm utfordring som krev fleire grep.

NAV-direktøren i fylket peikar på innvandrarar som ein framtidig ressurs. Samtidig poengterer han at fleire må motiverast til å utdanne seg innan helse- og omsorg. Det tredje momentet frå Thorsnes er kommunesamanslåing. Overfor NRK seier NAV-direktøren at kommunesamanslåing vil kunne føre til at ein får større fagmiljø som gir større rom for ulike typar arbeidsoppgåver og tilbod til den enkelte tilsette.

I ei tid med stor utflytting og sentralisering til byane, vil kommunesamanslåing som gir fleire og større fagmiljø kunne vere med på å snu denne trenden. Dette er eitt av fleire viktige poeng å ha med seg når veljarar og til slutt kommunepolitikarar skal seie ja eller nei til kommunesamanslåing. Skal regionen vi er ein del av utvikle seg og utgjere ein kraft, er det enklast å få til ved å slå ulike miljø saman til eitt. Om kombinasjonen Stryn, Hornindal og Volda verkar ukjend og skremmande i dag, er det utfordringane til dømes i 2035 og åra vidare ein må fokusere på. Det handlar om å sy saman kommunar som vert i stand til å løyse dei utfordringane som kjem, ikkje dei vi hadde i går. Difor er utspelet frå NAV-direktøren vel verdt å tenkje over.

Bengt Flaten

ansvarleg redaktør