Oskar Guddal Breivik frå Markane IL fekk overrekt DNB-stipendet for 2017 då skiskyttarane hadde sesongopning på Sjusjøen i helga.

Den lovande skiskyttaren fekk stipendet overrekt av landslagsløparane Hilde Fenne og Erlend Øvereng Bjøntegaard. Det er 13. gang DNB gir ut dette stipendet til unge skiskyttarar.

- Hensikta med DNB-stipendet er å hjelpe fleire utøvarar på vegen mot ein muleg internasjonal karrière. Vi er opptekne av å hjelpe talent fram til kanskje ein dag å følgje i Hilde og Erlend sine fotspor, og det er gledeleg å sjå at det vert jobba meget bra både hjå enkeltutøvarar og klubbar i junior- og rekruttklassane i Norge, går det fram av ei pressemelding frå skiskyttarforbundet.

I alt 23 løparar fekk tildelt stipendet som er på 7.500 kroner.