Sogn og Fjordane sitt førstelag stilte i favorittsjiktet då NM-stafetten i skiskyting gjekk av stabelen torsdag.
Med både Johan Eirik Meland og den olympiske meisteren Johannes Thingnes Bø på laget var det knytt visse forventningar til kva karane kunne stelle i stand.
Og det begynte så bra. Johan Eirik Meland skaut feilfritt på liggande skyting og hadde los på tetsjiktet. Meland tapte litt tid i sporet, men med fullt hus også på ståande skyting veksla han 55 sekund bak Buskerud og Hordaland som låg i tet. Jarle Midthjell Gjørven på andrelaget skaut også feilfritt og veksla ni sekund føre Meland.
Håvard Gutubø Bogetveit la ut på andre etappe, og det var her dramatikken fann stad.
- Han øydela bindingen lengst ute i løypa, og måtte vente lenge på ei ny ski, seier John Roger Meland i støtteapparatet.
Dermed rauk også ei god plassering for førstelaget, og draumen om å forsvare fjorårets gull brast. Den uheldige Bogetveit veksla nesten ni minutt bak teten, og løpet var dessverre spolert.
Trass dette skaut både Ole Morten Erdal og ankermann Johannes Thingnes Bø fullt hus på sine etappar.
Magnus Midthjell Gjørven hadde den heller tvilsame æra av å ha Thingnes Bø halsande bak seg i sporet på siste etappe, noko han neppe hadde sett føre seg. Men landslinjeeleven gjorde sine saker godt og kom i mål like bak Johannes.
Agder vann stafetten føre Oslo/Akershus og Hordaland.Sogn og Fjordane sitt førstelag vart nummer 17. Andrelaget, med to gonger Midthjell Gjørven, Isak Hopland og Erlend Bakken, vart nummer 18.