Kristoffer Arnes og Kristian Egge frå Transport og logistikk ved Stryn vidaregåande skule vann kvar si øving under Sogn og Fjordane-meisterskapen i yrkesfag.
100 elevar konkurrerte i 18 fag då Sogn og Fjordane-meisterskapen i yrkesfag gjekk av stabelen i Førde sist veke.
Tevlinga var open for publikum, og elevar frå ungdoms-skulen var spesielt inviterte for å få eit innblikk i dei ulike faga i praksis.
Deltakarane fekk på førehand utdelt oppgåvene og fekk tid til å planlegge og førebu seg før dei skulle i elden.
Lærerikt
Kristian Egge og Kristoffer Arnes frå Transport og logistikk ved Stryn vidaregåande skule gjekk heilt til topps i kvar si øving under meisterskapen.
Medan Kristian tok førsteplassen i øvinga økonomikøyring tok Kristoffer førsteplassen i øvinga presisjonskøyring.
Det tok dei nesten heilt til topps også samanlagt, Kristian Egge vart nr. 2 medan Kristoffer Arnes vart nr. 3.
– Det var kjekt å vere med og teste seg sjølv i forhold til andre elevar i transportfaget. Lærerikt! seier Kristian Egge til Fjordingen.
Heldt hovudet kaldt
– Å konkurrere i faget sitt framfor jury og publikum kan sikkert vere ganske nervepirrande?
– Eg var nervøs mellom kvar oppgåve/test, men akkurat under testen heldt eg hovudet kaldt og gjorde mitt beste.
– Kva nytte har de av ein slik konkurranse, trur du?
–Nytta er at du får sjå kor god du er og dessutan testa deg sjølv på nye måtar.
– Kva var kjekkast?
– Å køyre lastebilsimulatoren, både i økonomikøyring og presisjonskøyring!
Auke status og interesse
Sogn og Fjordane-meisterskapen i yrkesfag blir arrangert av fylkeskommunen i samarbeid med World Skills Norway.
World Skills Norway arbeider for å auka statusen til, interessa for og kvaliteten på yrkesutdanninga her i landet.
Bak organisasjonen står mellom andre NHO (Næringslivets Hovedorganisasjon), LO (Landsorganisasjonen i Norge), KS (Kommunenes Sentralforbund) og Utdannings- direktoratet.