Nærings- og fiskeridepartementet har fått den første vurderinga av lusepåverknad på vill laksefisk i produksjonsområda.
Den viser at det er moderat lusepåverknad på villaksen ved kysten av Nordfjord.
– Denne meldinga gir ei første vurdering til næring og styresmakter om tilstanden i dei ulike produksjonsområda. Til hausten kjem den endelege rapporten. Han tar også med seg overvakinga for 2017. Når den kjem har eg for første gong grunnlag for å legge til rette for vekst etter det nye systemet, seier fiskeriminister Per Sandberg.
I meldinga vert det konkludert det med at det er låg risiko for lusepåverknad på vill laksefisk i produksjonsområda 1 og 8-13, moderat påverknad i produksjonsområda 2 og 4-7, medan påverknaden er høg i produksjonsområde 3. Uvissa rundt analysane er stor i enkelte område. Det gjeld spesielt område 4, 6, 10 og dels 12.
Liste over produksjonsområda:
1: Svenskegrensa til Jæren.
2: Ryfylke.
3: Karmøy til Sotra.
4: Nordhordland til Stadt.
5: Stadt til Hustadvika.
6: Nordmøre til Sør-Trøndelag.
7: Nord-Trøndelag med Bindal.
8: Helgeland til Bodø.
9: Vestfjorden og Vesterålen.
10: Andøya til Senja.
11: Kvaløya til Loppa.
12: Vest-Finnmark.
13: Aust-Finnmark.
(©NPK)