Påtalemakta har henlagt saka mot ein lastebilsjåfør, etter ei front mot front ulukke i fjor der føraren av ein personbil omkom.
Ulukka skjedde i Marsåvika, på fv 60 mellom Stryn og Loen 11. november i fjor.
– Grunnlaget for henlegginga, er at vegens beskaffenheit var medverkande årsak til ulukka. Truleg har høgre hjulpar på lastebilen kome utfor den høge asfaltkanten. Då sjåføren forsøkte å få bilen opp att, fekk hjula tak og lastebilen skar over i motsett køyrefelt og frontkolliderte med den møtande personbilen. Det var glatt på staden, seier politibetjent Jan Tore Sunde.
Statens vegvesen var på staden og undersøkte vegforholda.
Lastebilføraren sitt førarkort var mellombels inndrege medan saka vart etterforska.