Innvik Fruktlager er verdens nordlegaste fruktlager og pakkeri. I fjor tok dei inn om lag 850 tonn bær, frukt og litt grønnsaker.

– Då vi Innvik Fruktlager starta opp for tjue år sidan var omsetninga tre millionar. I fjor nådde vi femti millionar og kurva peikar oppover, seier dagleg leiar Henriette Ansok Hatling.

Innvik Fruktlager er størst i landet på mottak av bringebær. I fjor tok dei inn 476 tonn der om lag 40 prosent gjekk til konsum. Prognosen fram mot år 2022 er 550 tonn.

Dei tok inn 220 tonn eple. Her prognosen 400 tonn, og det er rom for meir eple i marknaden. Det var 150 tonn plommer og prognosen er 200. Slær prognosane til er det snakk 1150 tonn frukt og bær inn til Innvik Fruktlager i 2022.

Innvik Fruktlager femner kommunane Stryn, Gloppen, Eid og Norddal. Verksemda har tre fast tilsette, men i høgsesongen sysselset dei 20 sesongarbeidar.

– Vi byggjer prognosane på det vi veit som er planta og skal bli planta den næraste tida, seier Hatling.

Nyplanting: Atle Skaaden til v og Svein Kvame ser på den nye, moderne måten for planting av epletre
Prosjektmøte: Prosjektmøte om nye sortar bringebær. Frå v. tidlegare fylkesgarnart Torbjørn Takle, Håvard Lyslo, Stein Harald Hjeltnes, dagleg leiar Njøs Næringsutvikling, Reidar Bakketun, fylkesgartnar Jon Anders Stavang, Atle Skåden, styreleiar Innvik Fruktlager, Steinar Dvergsdal og Wald Lyslo. Ståande dagleg leiar ved Innvik Fruktlager, Henriette A. Hatling.

Arbeid heile året

Arbeidsdagen for dei tre ved fruktlageret er ikkje over når siste bæra og eple er ute frå lageret.

– Vi må skaffe oss oversyn over det som skal plantast, kven som skal ha plantar, og fruktlageret i Innvik er i ferd med å bli for lite. Vi må utvide. Vi må etter kvart også vurdere ei heilårsstilling til, seier ho.

I dag leiger dei frysekapasitet både på Sandane og på Rudshøgda, men målet er å samle alt i Innvik.

I takt med marknaden

Dei må heile tida vere i takt med marknaden og levere det folk vil ha. Det krev stadig fornying, og vinteren blir brukt til kompetanseheving og nye utviklingsprosjekt Førre måndag var dei samla til prosjektmøte saman med fagfolk frå rettleiingstenesta, men hovudpersonen kom ikkje grunna vind og problem med fly.

Men dagen gjekk med til å diskutere nye mulegheiter.

– Det vil truleg bli sett i gang to nye prosjekt styrt frå Innvik i vinter. Det eine er ein ny og annleis produksjonsteknikk der bringebærplantane vert sett i potter i staden for i bakken. Det andre er eit prosjekt for bringebær til industriføremål. Bringebærproduksjonen får ein stadig meir krevjande marknadssituasjon, og då må ein sjå etter andre alternativ, seier Hatling.

Ein veg å gå er nye sortar. Det gjeld også eple og plommer.

– Det blir meir og meir fokus på styrt produksjon. Det krev produksjonsplanlegging og at det som vert produsert er tilpassa marknaden, seier ho og legg til at det er viktig med gode prognosar i framkant av sesongen og god kommunikasjon gjennom heile verdikjeda gjennom sesongen.

God avling: Innvik Fruktlager tek 180 tonn eple av beste kvalitet.

Sterk vekst

Innvik Fruktlager er sjølve navet i den store satsinga på frukt og bær i Stryn og Gloppen, og spesielt i Vikane. Det aller meste av det som skjer frå innkjøp av plantar til utplanting, hausting og leveranse til marknaden skjer gjennom fruktlageret. Det er også dei som får inn plantar til jordbærproduksjon i drivhus.

Det er framleis areal som kan takast i bruk. Pr i dag er det registrert 171 dekar som er planlagt for utplanting. Det gjeld både bringebær, eple og plommer. Ut frå eksisterande areal som er utplanta vil det gje ein vekst på om lag 17 prosent.

– Stadig fleire ynskjer å produsere bringebær under plast. Til no er 132 dekar under plast. Det er om lag 35 prosent av bringebærproduksjonen, men det er rom for meir av denne typen produksjon og det vil gje betre leveringspresisjon og også betre planlegging, både for produsent og mottak, seier Hatling.