Oskar Raftevold er utteken til landslagssamling i volleyball. Innvikaren, som spelar for Førde, fekk gladmeldinga måndag.
– Eg såg det nettopp sjølv, så eg er litt sett ut, seier Oskar når Fjordingen kontaktar han like etter at bruttotropp-uttaket på 36 spelarar er offentleggjort.
Eit hovudmål
Oskar, som blir 22 år på søndag, seier at han har jobba for dette uttaket:
– Dette har vore hovudmålet mitt dei siste to åra, men planen var opprinneleg å jobbe meg inn i bruttotroppen innan eg vart 24 år gamal.
God motivasjon
Ungguten takkar landslagsleiinga for sjansen han no får til å vise seg fram:
– Eg veit av erfaring at Tore Aleksandersen er ein av dei beste trenarane landet har å by på. I og med at eg får matcha meg med dei beste spelarane så blir dette ei god erfaring som eg tek med meg vidare. Ei slik landslagssamling gir absolutt motivasjon til å satse endå hardare framover.
Spelarane som er tekne ut til landslagssamlinga vil møtast i Oslo siste veka i mai. Med seg får Oskar heile sju lagkameratar.
Du kan lese meir om Oskar og landslagsuttaket i fredagsavisa.