Stryn formannskap vedtok samrøystes at prisen på den 1,1 dekar store tomta (gnr. 86, bnr. 242) på Oldenleirane blir sett til 300.000 kroner. Næringsarealet vil no bli lagt ut for sal.
– Er det krav til kjøper om type etablering og er det tidsperspektiv på dette? spurde Torstein Tvinnereim (V).
– Ja, i første omgang blir pris fastsett før tomta lysast ut. Forhåpentlegvis vil det vere interessentar som formannskapet i neste runde skal ta stilling til før sal, forklarte plan- og næringssjef Geirmund Dvergsdal.
– Det er fleire i Olden som spør etter areal. Ut ifrå beliggenheita er denne sikkert interessant for dei som driver med direkte, eller indirekte, i forhold til cruiserelatert næring, sa ordførar Sven Flo.
Arealet er i gjeldande reguleringsplan avsett til forretning/kontor/bustad/industri (F/K/B/I) med tilhøyrande reguleringsføresegner.