- Jonas Gahr Støre og Helga Pedersen er kjent med situasjonen i Sogn og Fjordane, og ser korleis regjeringa si endring i inntektssystemet råkar tilbodet til innbyggjarane våre.  No spelar vi på lag for å finne ei løysing.

Det seier Hilmar Høl, leiar i Sogn og Fjordane Arbeidarparti, i ei pressemelding .  Saman med stortingsrepresentant Ingrid Heggø, fylkesordførar Åshild Kjelsnes og gruppeleiar Nils P.Støyva,  møtte han dei to sentrale Ap-toppane fredag ettermiddag på Stortinget. Tema var regjeringa si endring i inntektssystemet for fylkeskommunane, som har slått aller hardast ut for Sogn og Fjordane.

- Det vil råke dei vidaregåande skulane våre, tannhelsetenesta, samferdsel og kultur. Derfor er eg glad for at både Jonas og Helga var klare på at vi må finne fornuftige kompensasjonsløysingar, slik at tilbodet til innbyggjarane våre blir likeverdig med det andre fylke kan gje, seier Høl.

- For Arbeidarpartiet er det uaktuelt å akseptere at Sogn og Fjordane blir råka på denne måten, som regjeringa Høgre/Frp legg opp til her, seier Helga Pedersen. Arbeidarpartiet vil gjere det dei kan på Stortinget denne hausten, fortel Høl:

- Vi vil saman gjere det vi kan for å få med oss regjeringa sine støtteparti, KrF og Venstre, på ei rettferdig løysing for Sogn og Fjordane.