21. september er fristen for å sende inn framlegg til årets gründerpris i Sogn og Fjordane.

6.november skal «Årets Gründer 2015» kårast, og det er fjerde gongen at prisen vert delt ut. Vinnaren får med seg 100 000 kroner som startkapital til nyskapinga si, går det fram av framtidsfylket si heimeside.

Utdelinga er eit samarbeid mellom Sparebanken Sogn og Fjordane, Innovasjon Norge, Framtidsfylket og Sparebankstiftinga Sogn og Fjordane.

- Målet med prisen er å stimulere til innovasjon i Sogn og Fjordane, og samtidig gje dei som allereie er innovatørar ei viktig merksemd, seier Pål Fidjestøl, kultursjef i Sparebankstiftinga Sogn og Fjordane.

Etter søknadsfristen vert det plukka ut om lag fem finalistar, som alle vert presentert på framtidsfylket.no den 14. oktober. Publikum vert deretter invitert til å stemme fram sin favoritt, fram til vinnaren vert kåra på Temposeminaret i Florø 6. november.