Det var svært mange unge og talentfulle korspmusikarar i indre Nordfjord på 1980-talet. Fleire av dei har vist igjen i musikklivet i vaksen alder, som dirigentar, musikarar, komponistar og administratorar.
Mange av dei var også sentrale då Nordfjord Ungdomskorps vart skipa i 1981. Korpset var vidgjete for sitt høge nivå, noko som mellom anna vart vist gjennom konsertar for fulle hus i Loensal 1 på Hotel Alexandra i Loen.
I Fjordingen frå 19. juni 1987 kan ein lese om den store avslutningsfesten for Stryn Skulekorps det året.
Avslutninga vart markert med fest på Hotel Fagre Stryn (no Stryn Hotel), der det må ha vore fullsett sal: 180 frammøtte i tillegg til eit korps på over 50 medlemmar og eit nesten like stort aspirantkorps. Oppå det heile stilte drillen med to tropper.
Og det var ikkje småtteri som stod på repertoaret.
- Korpset spela ein ny låt av dirigenten, Arve Henriksen. Den var verkeleg verd å høyre på. Henriksen var sjølv solist på trompet, skriv Martin Lilleheim.
At det var populært å spele i korps, viste også den høge gjennomsnittsalderen. Stryn Skulekorps valde å dele ut sin eigen statuett til dei som held fram i korpset til fylte 18 år og gjerne etter dette også. Denne kvelden vart dei første utgåvene av Musikkstatuetten delte ut.
I reportasjen i Fjordingen kan ein lese fylgjande om denne statuetten:
Formannen i Stryn Skulekorps, Jon Kjørstad, sa at det er mange som held fram i korpset både til dei er 18 år og eldre.
- Vi har lenge prøvd å finne ei slags påskjøning til desse. Ei takk for verdfull innsats. Men det har ikkje vore lett å finne noko som høvde. Ein fekk då ideen om å få til ein spesiell statuett, og det var Harry Høvik som først forma han ut. Seinare har og Rolf Taraldset i Hornindal vore inne i bildet, og Musikkstatuetten frå Stryn har verkeleg vorte noko å gle seg over. Gjennom Stryn Skulekorps er det sendt tilbod til korps over heile landet, og dei første bestillingane er alt komne, fortalde Kjørstad.
Men som seg hør og bør var det i Stryn dei aller første statuettane vart utdelte, og dei gjekk til dirigentane Arve Henriksen og Nils Are Karstad Lysø. Men også heile 17 andre fekk statuetten denne kvelden for lang og tru teneste i skulekorpset.