Denne veka vart solbrillemerket Boe&Sunde ein realitet då to solbrillemodellar vart lagt ut for sal.
Endret: 09.07.2010 kl. 13:15
For om lag eit år sidan fekk stryningen Lars Sunde (20) ein idé om å lage solbriller av tre. No har Sunde og kameraten Sigve Bø (18) lansert den første kolleksjonen.
Unike
Idèen til solbrillene fekk Sunde ein sommar han trilla ved hos onkelen sin.
- Det var mykje sol og eg hadde gløymt solbrillene mine, og onkelen min hadde ekstremt mykje ved. Eg tenkte at vi heller kunne lage solbriller enn å setje fyr på all veden, ler Sunde.
Vidare tok han kontakt med Sigve Bø. Dei to brukte mange timar på å spikke briller i buda til Sunde.
- Vi måtte sjå om tanken gjekk an å gjennomføre, og ved å spikke brillene sjølve fekk vi bekrefta at materialet var sterkt nok, og at det faktisk var gjennomførbart, seier Bø.
Med etableringsstipend frå Innovasjon Norge var gutane klare til å gå i gong med sjølve produksjonen, men startfasar er som regel ikkje problemfri.
- Vi hadde som mål å lansere kolleksjonen til påske, men på grunn av komplikasjonar med den tidlegare produsenten, vart vi tvungne til å skifte fabrikk, seier Sunde.
No vert brillene laga i ein fabrikk som også har produsert solbriller for Mercedes Benz.
- For oss som er nye i bransjen, er det ei sikkerheit å vite at fabrikken har produsert varer for så store aktørar, då dei stiller store krav til fabrikken. Kvart enkelt par vert laga for hand, og alle brillene er unike, seier Bø.
Etisk standard
Bø og Sunde er opptekne av ein miljøvennleg og etisk standard.
- Vi tek avstand frå svartelista tre, og vi legg vekt på at tresorten ikkje er frå eit pressa naturområde, seier Bø.
Håpet er å lage solbriller i tre som kjem frå ulike område i Norge.
- Vi har lyst til å bruke tre frå kjende naturområde i Norge. Til dømes Geiranger og Stryn, og kalle opp brillene etter områda. Geiranger har allereie sagt ja, smiler Sunde.
I framtida vil dei også flytte grovproduksjoen tilbake til Hornindal.
Les meir i papirutgåva
