Stryn spelte ein svak kamp og tapte 1-3 mot Tertnes på Stryn stadion i dag. På sidelinja stod også 19-åringen Justas Busmic frå Litauen som nettopp hadde signert for Stryn og som kan bli ein verdifull spelar utover hausten. Ungguten har spelt i toppklubben FK Kruoja på høgre backplass og bur no i Innvik der han prøver å få seg jobb.
-Kva syntes du om kampen?
-Det var mange lange pasningar. Eg likar best å ha ballen langs bakken.
At langpasningane vart for dominerande i kampen, kunne også trenar Dagmund Evebø og veteran Jon-Terje Tjellaug skrive under på:
-Vi slo langt heile vegen og mangla bevegelse. Ballen kom like fort tilbake, sa Evebø.
-Vi slo for mykje på fremste bevegelse. Det vart for enkelt å lese for Tertnes. Vi hekk ikkje i hop som lag, sa Tjellaug.
Bortsett frå det gode opningskvarteret, skapte Stryn lite. Oddne Årdal skaffa Stryn leiinga på ei klassescoring etter 5 minutt, men før pause prikka den tidlegare Brann og LøvHam-spelaren Matias Møvik inn to fulltreffarar på veterankeeper Pål Erik Ytreeide utan å bli pressa av stryneforsvaret.
Frank Liljedal auka til 1-3 berre minuttet etter pause. Frå der og ut var det minimalt med underhaldning på Stryn stadion.