– Avtalen treffer landbruket kraftfullt negativt i den situasjonen som no utspelar seg, seier leiar Lars Petter Bartnes i Norges Bondelag til Klassekampen.
Ytterlegare 400 tonn skal inn på marknaden allereie før jul. Når avtalen trer i kraft for fullt, aukar den tollfrie importen med 1.600 tonn, til saman 2.500 tonn storfekjøtt i 2019.
Fryktar nedleggingar
Samtidig som importen aukar, må mange bønder slakte ned besetninga grunna fôrmangel etter tørken. Auka import vil auke konkurransen for norske bønder.
– Eg kjenner til tilfelle der det er risiko for konkurs med tilhøyrande nedlegging av drifta, seier Bartnes og legg til at det vil svekkje norsk matproduksjon.
– Det er no endå viktigare at forbrukarane leitar etter matvarene merkte med «Nyt Noreg» og sikrar at det er norske matvarer som blir sette på bordet.
Raudt-leiar Bjørnar Moxnes meiner det er galskap å auke importen no.
– Vi vil ha eit klart svar frå landbruksministeren på om han vil stoppe denne auka importen. Dette kan slå beina under livsgrunnlaget for bønder landet rundt, seier Moxnes.
Meiner handel er løysinga
Landbruksminister Jon Georg Dale (Frp) meiner utsegnene frå Bondelaget og Raudt er langt over mål.
– Dei 400 tonna som skal importerast før jul, er innanfor det importbehovet vi uansett har. Argumentasjonen deira tar utgangspunkt i at Noreg er sjølvforsynte med storfekjøtt, mens vi i mange år har måtta importere. Så seint som i juni i år hadde vi anslag på at vi måtte importere 7.600 tonn storfekjøtt i år for å dekke behovet, seier Dale til NTB.
– Slik det er no, er handel løysinga og ikkje problemet, seier Dale.