Meteorologen varslar klassisk julivêr

Juli: – Det er klassisk julivêr. Fint vêr med sol, men så kan det kome nokre byer, seier statsmeteorolog Geir Ottar Fagerlid.  Foto: Olav Jakob Tveit

Regnskurar: Lokalt kan det kome kraftige regnskurar framover.  Foto: Gunnhild Sindre

New Articles

Lokalt kan det kome nokre skikkeleg kraftige regnskurar, men sommarvarmen held fram likevel. Det blir varme, fine dagar i lang tid framover.

– Vi har eit veldig fint kystvêr. Det er lite nedbør, særleg i ytre strøk. Det er berre i indre strøk det kan bli regnbyer med tore om ettermiddagen, seier statsmeteorolog Geir Ottar Fagerlid i Meteorologisk institutt. Det var varsla store mengder lokalt regn i Trøndelag onsdag, men også torsdag og fredag er det fare for skikkelege skurar både i Trøndelag og på Vestlandet.

I helga blir det tørt, og til veka er det tilbake igjen til nokre få byer.

– Det er klassisk julivêr. Fint vêr med sol, men så kan det kome nokre byer. Det gjeld fram til neste helg, seier Fagerlid.

25 grader

I indre strøk blir det omtrent 25 grader: Ved kysten, der det er meir vind, blir det litt lågare temperaturar, men også her er det venta rundt 20 grader.

– Enkelte dagar er det mykje sol og andre dagar meir skyer, men det blir likevel varmt sommarvêr. Nokre stader får truleg ikkje nedbør i det heile i perioden fram til neste helg, seier meteorologen. Han åtvarar om at det er veldig tørt og at det er varsla fare for skogbrann på Vestlandet. Det same gjeld også Sørlandet og Austlandet. Sjølv om det kan koma lokalt regn vil det ikkje hjelpe særleg.

– Det er stor fare for at det kjem altfor mykje på kort tid og at det renn bort og ikkje trekkjer ned i jordsmonnet.

Heile landet

Sommarvêret pregar endeleg heile landet. Også i Nord-Norge blir det fint og varmt vêr med nokre regnbyer. I Indre Finnmark blir det verkeleg varmt med opp mot 25 grader.

– Det er fleire høgtrykk som gjev det varme vêret. Eit ligg over Kolahalvøya nord i Russland, eit over Storbritannia og eit over Austersjø-området. Desse høgtrykka pregar vêrsituasjonen, seier statsmeteorolog Geir Ottar Fagerlid i Meteorologisk institutt. Det som finst av lågtrykk held seg vest for Island og i ein bane opp til Spitsbergen.

– Det skal litt til for å bryte opp vêrsituasjonen som no har vart i mange veker. Høgtrykket har kilt seg fast. Det er gunstig for dei som likar tørt og varmt vêr, men ikkje bra for skogbrannfaren og bøndene, seier han.

Tropisk storm

Meteorologen forklarar at vi er nøydde til å få kraftigare vêr ute i Atlanterhavet for at høgtrykket skal brytast opp. Lågtrykket kjem gjerne som restar av gamle tropiske stormar eller orkanar. Sesongen begynte no i juli, men er ikkje på topp før i august og september.

– Vi må nok vente nokre veker før vi får meir vanleg vestavêr med lågtrykk. I helga er det ein tropisk storm utanfor austkysten av USA. Han flyttar seg inn mot Europa i byrjinga av neste veke, men stoppar ved Island.

(©NPK)