– Det er viktig lokalt at alle politiske parti står samla, uansett kva regjering som sit med styringa

Når NTP no skal rullerast, er vi framleis avhengige av at alle lokalparti og alle kommunar i området dreg i same retning. Vestland Ap har spissa sin bodskap om at liv og helse skal vere avgjerande for satsing på samferdsle og det støttar Stryn Ap fullt ut. Det betyr m.a. auka innsats på rassikring.

I «kampen» om å vere Strynefjellstunellen sine beste forkjemparar finn vi Sve (Frp M&R), Bjørlo (V) – og no Stryn Høgre.

Sonja Øvre-Flo og Arnljot Sæternes hevdar i Fjordingen at «Forrige NTP, fremma av regjeringa Solberg, skapte håp fordi vi fekk på plass viktige prosjekt på heile Vestlandet». Dei konkluderer med at no ser det mørkt ut, - fordi Regjeringa ikkje prioriterer samferdsle.

Vi hugsar alle at rv 15 og Strynefjellet aldri kom med i Solberg-regjeringa sin plan i 2021, trass i eit tverrpolitisk og massivt press frå vår del av landet, frå Ålesund til Otta. Verken H, Frp eller V nådde gjennom til eiga regjering.

Det er viktig lokalt at alle politiske parti står samla, fortsetter trykket og er med på denne satsinga inn mot uansett kva regjering som sit med styringa.

Vi må ha Strynefjellstunell rv 15 inn i NTP.

Anita Linda Pettersen Almskår og Haldor Hove

Stryn Ap