Brannvesenet i Stryn rykte måndag ettermiddag ut til brann i eit bratt område med gras og kratt, like ved badestranda ved Staveneset. Dei fekk melding i 16.30-tida, og brannen vart sløkt etter kort tid.
- Det var ein eingongsgrill midt i brannen, men det er ikkje godt å vite om det er brannårsaka. Det er så tørt no at det er nok å kaste frå seg ein sneip. Brannen er no sløkt. Vi har kontoll, og driv ettersløkking på staden, sa brannsjef i Stryn, John Jatgeir Vinsrygg i 17-tida.
Det er for tida stor fare for grasbrann på heile Vestlandet, etter ein lang periode utan nedbør. Brannsjefen minner folk om det ordinære forbodet mot bruk av open eld i utmark, som gjeld frå midten av april til midten av september.
- Det er ikkje lov å brenne bål eller anna bruk av open eld i utmarka no, seier Vinsrygg.
- Vi oppfordrar folk om å vere forsiktige, og sjå etter om eingongsgrillar er skikkeleg sløkt etter bruk, seier politioverbetjent Lasse Trosdahl.