Linda Gytri hadde alt takka ja til jobben som kulturskulerektor i Volda, men då Stryn kommune kunne tilby rektorstilling heime i Stryn, så var valet enkelt.
– Det er klart eg har eit hjarte for Stryn, seier Gytri som alt har sju års erfaring som lærar ved kulturskulen.
Offisielt tek ho til i stillinga 1. august, men tek gradvis over etter Ingrid Heieren som har vore stedfortredar for avtroppande kulturskulerektor Tom Antonsen.
Kulturskulen har over 100 elevar, men skulen har eit mål om betre rekruttering og vil satse på kvalitet i opplæringa. Eit ledd i dette er å tilsette både danselærar, songlærar, pianolærar og kunstlærar til neste skuleår.
– Kulturskulen har eit utviklingspotensial og det vil vi ta tak i med nye, større og betre eigna lokale med flinke lærarar som set elevane i fokus. Dette blir eit stort løft for oss, seier Gytri.
Flyttinga til 3. etasje i kulturhuset tek til allereie neste veke.
Kulturskulen har vore i Stryn i 30 år og vil markere dette med jubileumskonsert til hausten.
Sjå utdrag frå kulturskulekonserten