Fredag hadde 130 niandeklassingar i Stryn, Olden og Hornindal fagdag, der elevane besøkte ulike bedrifter utifrå interesse.
– Dette er eit samarbeid mellom skule og næringsliv. Bedriftene har stilt opp i hopetal, og mange arbeidsplassar er involverte, seier Torstein Tvinnereim, som er koordinator for opplegget.
På førehand hadde elevane fem hovudområde dei kunne velje mellom: Bygg, helse, studiespesialiserande, service og samferdsle og tip/elektro. Deretter gjekk turen rundt til ulike bedrifter.
– 32 arbeidsplassar har stilt opp for å gje elevane informasjon slik at dei blir kjent med arbeidsplassane, fortel Tvinnereim. Han seier også at fagdagen er eitt av fleire tiltak som skal hjelpe elevane med å finne ut kva yrkesretningar dei kan velje mellom. I tillegg til fagdagen blir det også arrangert ein utdanningsdag på Stryn vgs på hausten der bedriftene har stand.
– Heile næringslivet har vore positive, og dei synest dette er ein viktig dag, avsluttar Tvinnereim.
– Ein flott og lærerik fagdag, meinte Daniel Langeset og Tom Adriel Jevnlid som går på ungdomsskulen i Stryn.
