Dronninga feira Bjørgvin bispedømmes 950-årsdag

- Markerer kristninga av Vestlandet

Dronning Sonja og klima- og miljøminister Ola Elvestuen var søndag på plass på Selje kloster i Sogn og Fjordane for å feire at Bjørgvin bispedømme er 950 år.

Dronning Sonja deltok i markeringa av at Bjørgvin bispedømme er 950 år. Her er ho saman med Seljes ordførar Stein Robert Osdal (i midten) og Bjørgvin-biskop Halvor Nordhaug (t.h.)  Foto: Foto: Liv Anette Luane / Det kongelege hoff / NTB scanpix / NPK

Nyhende

– Selje kloster er ein magisk og vakkert stad, og denne markeringa har ei heilt spesiell historisk tydning for Norge, sa Elvestuen til NTB om markeringa søndag.

Dei lærde stridast om nøyaktig når det vestnorske bispedømmet, seinare døypt om til Bjørgvin bispedømme, blei grunnlagt. Det einaste ein veit, er at det ifølgje sagaene skal ha skjedd i Olav Kyrres styringstid (1067-1093).

– Markerer kristninga

Olav Kyrre grunnla i si tid det første bispesetet i bispedømmet på den vesle øya Selja i Selje i Nordfjord, og uansett kva for eit år sjølve grunnlegginga skjedde, skal 950-årsdagen markerast i år.

– Denne dagen markerer kristninga av Vestlandet, sa Elvestuen.

Bjørgvin-biskop Halvor Nordhaug, Seljes ordførar Stein Robert Osdal og riksantikvar Jørn Holme var også til stades under markeringa.

Kystpilegrimar

Bjørgvin bispedømme hadde planar om å la 950-årsdagen gå forbi i stilla, men interesse frå dronninga og eit sterkt ønskje frå lokalbefolkninga førte til at det blei feiring likevel.

Dronninga deltok også på 900-årsmarkeringa i 1968, saman med sin då nyforlova kronprins Harald, og kong Olav.

Dronninga opna søndag også den nasjonale kystpilegrimsmarkeringa ettersom dei fleste pilegrimsreisande kom med båt. Til saman fem fylke i Norge deltok i kystpilegrimsmarkeringa.

(©NPK)