Liatunet i Innvik vert rekna som eit av Vestlandets eldste mest komplette gardstun. Til saman elleve bygningar finn ein på garden som har røter tilbake til 1500-talet. Sistbuande var Brita Lien, ho budde fram til 1998 og testamenterte eigedomen til Stryn kommune. I 2001 vart det av praktiske omsyn oppretta ei stifting som som overtok Liatunet.
– Målet er å halde ved like, og bruk er det beste vern, sa leiar for stiftinga, Dag Vanberg, då han ønska publikum velkomne og fortalte kort om bakgrunnen for Liatunet og om programmet for dagen. Vanberg er ein framifrå formidlar og han er eit programinnslag i seg sjølv der han levande fortel om hendingar som har funne stad i tunet.
Vaks opp i Liatunet
Ei som veit betre enn nokon om livet i Liatunet, i alle fall i nyare tid, er Idun Egge Nilsen -eller Idun i Li som ho helst blir kalla. Bornlause Brita og Peder Lien tok til seg Idun som var tanteungen til Brita. Ho flytta dit som åtteåring i 1951 og budde der fram til 1963.
– Eg har veldig mange gode minner her ifrå. Peder og Brita var veldig glad i born. Eg kom frå ein stor søskenflokk i Hjelledalen og var van med å dele med mange, og så kom eg her og var einebarn, smiler ho.
Idun sit i dag i styret for stiftinga og er svært takksam for innsatsen som vert gjort for å halde barndomsheimen i hevd.
– Det er heilt fantastisk korleis særleg Dag, Solveig og Asbjørn (Heggdal, journ. anm.) held det ved like, skryt Idun.
Handverk og musikk
Sentralt for Sommartreffet er å gjenskape litt av den «gamle ånda» i tunet. Bakst laga i steinomnen i eldhuset, heimelaga rømegraut og demonstrasjon av gamalt handverk bidreg til det.
Frå såpekoking og toving tidlegare år, hadde arrangøren valt å utvide handverksomgrepet noko, når dei denne gongen sette griseslakting på plakaten.Her demonstrerte Lidvin Hage handverket han sjølv hadde lært av Magne Høgalmen.
Også Randis gammeldansorkester gav liv i tunet med flott tradisjonsmusikk. Litt plass til ein svingom var det einaste som mangla!