Samferdsleminister Jon Georg Dale

Lovar meir fleksible rabattordningar på ferjer

Samferdsleministeren har bede Statens vegvesen om å få på plass dei same rabattordningane i det nye AutoPASS-ferjekortet som ein hadde ved tidlegare verdikort.  Foto: Bengt Flaten

Nyhende

- Regjeringa ønskjer å gjere det så enkelt som mogleg å ferdast i trafikken. Ved overgangen til AutoPASS-ferjekort frå januar i år opplevde mange at dei har mista gode rabattordningar. Det har aldri vore meininga. Derfor ber eg no Statens vegvesen om å betre fleksibiliteten og dermed gi like gode rabattordningar med AutoPASS-ferjekort som tidlegare praksis med verdikort, seier samferdselsminister Jon Georg Dale, i ei pressemelding.

I januar i år blei AutoPASS for ferje innført, med mellom anna AutoPASS-ferjekort for betaling på ferjer. AutoPASS-ferjekort erstattar verdikort og storbrukarkort. Kortet er knytt til køyretøyet. Eit hushald kan ha to bilar per kort. Praksis med verdikort var at desse korta vart nytta på ein meir fleksibel måte, som eit ihendehavarkort. Mange opplever overgangen som ei skjerping av rabattreglane.

Særleg idrettslag og transportørar har klaga på ordninga, som fører til at dei må betale inn større forskot enn tidlegare for å oppnå rabattar.

No skal Statens vegvesen sjå om det er mogeleg å gjere AutoPASS-ferjekorta så like verdikorta som mogleg. Rabattane er dei same som tidlegare, skriv Samferdselsdepartementet i ei pressemelding.

– Vi ønskjer òg at innføringa av brikkebetaling skal skje så fort som mogeleg, derfor skal Statens vegvesen sjå på korleis dei kan gjere det raskare enn planlagt. Samstundes er det viktig at næringstransporten får gode vilkår langs norske vegar. Derfor må dei få høve til å få same rabatt med meir fleksible betalingsmåtar, seier samferdselsministeren.

Denne artikkelen stod først på trykk i Møre-Nytt