- Heilt unormalt vêr på fjellet:

Uvêr og overfløyming på fjellet

Fjellovergangen mellom Skjåk og Stryn blir ikkje opna att for trafikk tysdag.

Frå Statens vegvesen sitt webkamera i Grasdalen.   Foto: Statens vegvesen, webcam

Nyhende

Fjuken: – Det har kome utruleg mykje regn i natt. Det er heilt unormalt vêr på fjellet nå, fortel Pål Storødegård i Mesta til Fjuken.

Tysdag morgon kunngjorde Statens vegvesen at riksveg 15 mellom Skjåk og Stryn ikkje blir opna att tysdag. Fjellovergangen har vore stengt sidan natt til måndag grunna uvêr og rasfare.

– Det har vore eit utruleg styggevêr. Også vart det betydeleg rasfare måndag ettermiddag og kveld. Dei store mengdene med vatn kom i natt, seier Pål Storødegård.

Han har ikkje vore på fjellet og sett overfløyminga sjølv, men fortel at det skal vere overfløyming både ved Legeret og ved Nysetra.

– Det blir nå arbeidd med å få bort vatnet, seier Storødegård.

Han fortel elles at det er meld mykje vind på fjellet utover dagen og ettermiddag tysdag.

Onsdag klokka 10.00 vil Statens vegvesen gjere ei ny vurdering på om fjellovergangen er trygg nok til å opnast att for trafikk.

Saka vart først publisert på Fjuken.