Marie Kristin Taklo frå Stryn skal i morgon delta på feiringa av kongeparet sitt 25-årsjubileum saman med fylkesmann Anne Karin Hamre. Då fyller Marie Kristin også 25 år.
Det er i morgon ettermiddag at regjeringa inviterer kongefamilien, Stortinget og gjester frå heile landet til ei festførestilling i Universitetets aula. Etter festførestillinga er Marie Kristin også invitert til ei mottaking hjå statsministeren i Parkveien 45, saman med fylkesmennene og 25-åringar frå alle fylka i landet.
Marie Kristin er utdanna innan sosialt arbeid ved Høgskulen i Volda, og jobbar som miljøterapeut i heimetenestene for funksjonshemma i Stryn kommune. Søndag vil Marie Kristin få ekstra merksemd på bursdagen sin. Saman med 25-åringen Chinour Palani Jafi frå Buskerud og statsminister Erna Solberg, vil ho bli intervjua av Erik Solbakken på scena på Universitetsplassen kl 15.
Søndag 17. januar vert jubileumsdagen markert med ei gudsteneste frå kl. 11, og deretter vinterleikar og publikumsarrangement på Slottsplassen og Universitetsplassen. Regjeringa arrangerer programmet på jubileumsdagen som ei gåve til kongeparet.
Festførestillinga i Aulaen vil ta publikum med på ei reise gjennom Norge si utvikling dei siste 25 åra, og syne monarkiet si rolle parallelt med denne utviklinga. Førestillinga vert produsert av NRK fjernsyn, og vert send i opptak på NRK1 søndag kveld.