– Det er givande å møte så mange menneske frå andre nasjonar, fortel Else.
Det heile starta for 30 år sidan då paret kjøpte nabogarden som tilleggsjord. Då stod det blant anna fjøs og fleire uthus til nedfalls. Else og Hjalmar starta frå grunnen av med å hente ut tømmer frå eigen skog, som dei fekk saga og høvla på lokale sagbruk.
– Trenden har vore å nytte lokalt næringsliv til det meste i hyttene, fortel Hjalmar.
Den første hytta blei bygd der fjøsen stod, og så var eventyret i gong.
I 1995 var hyttene klare for utleige, medan dei fortsette arbeidet med restaurering av hus. No har dei to hytter, to hus og ei leilegheit til utleige.
– Det har vore mykje arbeid, men det vore kjekt å sjå resultatet. Det å få til noko gir inspirasjon til vidare satsing, seier han.
Kjem stadig tilbake
Fleire av turistane som kjem til Robjørgane har vore gjester sidan starten, og kjem stadig tilbake.
– Her er dei som kjem fast nesten kvart år, seier Hjalmar.
Mange har vore her på sommaren, og kjem tilbake for å oppleve den norske vinteren.
– Turistane er gode på å kartlegge og legge ruter der dei får sett mest mogleg, så innser dei at her er det meir og sjå, og vil kome tilbake, fortel dotter Therese Dispen.
Mange attraksjonar
Dei utanlandske turistane kjem for å oppleve alt regionen har å by på. Alt frå lokale attraksjonar som Tvinnefossen, Briksdalen og Hoven, til dagsturar til Geiranger, Runde og Vestkapp. Turistane kjem også i stor grad for å nytte seg av naturen i området.
– Verdien av det tilgjengelege fjellandskapet rundt oss er stor. Her får ein følelsen av å ha fjellet for seg sjølv, og det er verdsett, seier Therese.
Moglegheitene er mange for ski- og fjellturar, om det er i langrennsløypene på eksempelvis Vangen eller Ullsheim, eller på toppturar med randonee.
– Moglegheita til å kunne spenne på seg skia rett utanfor døra og gå med panoramautsikt til ein kvar tid, er unik, seier Therese.
Ein livsstil
Å drive med utleige er for familien ein livsstil, og dei strekk seg litt ekstra for å gi gjestane ei god oppleving.
– Eit av våre kjenneteikn er å ta godt imot turistane, la dei føle seg varetekne og få ei ferieoppleving i fantastisk natur med panoramautsikt over indre Nordfjord. Stryn er blitt ein godt kjent stad på verdskartet, men vi har framleis potensial til å auke opp og få vist alt vi har å tilby på vinterstid, seier Hjalmar.