Rutine kjem godt med i dei fleste yrke, også i klesbransjen.

Då May-Helen Lødemel Flaten, som driv PeBe Klær i Hornindal, fekk besøk av eit par i butikken sist veke, reagerte ho på ein litt uvanleg oppførsel:Medan mannen gjekk bak til prøveromma for å prøve kle, gjekk kvinna rundt framme i butikken, utan å vise interesse. – Ein ting er sikkert, og det er at dama alltid vil vere med og sjå og uttale seg når mannen prøver kle! seier butikkeigaren. Då paret forlet butikken såg mannen «godt påkledd» ut og hadde drege glidelåsen heilt opp på ytterjakka si.

-Såg litt "stappa" utElisabeth Gamlem Lødemel, som driv butikk i nabolokala, reagerte også på at mannen såg «litt stappa» ut. Dermed bestemte butikkeigaren seg for å gå ut etter paret, som stod på parkeringsplassen med to bilar; ein kassebil og ein privatbil. Kassebilen stod med opa dør medan mannen var borte og snakka med dama i den andre bilen. På setet i kassebilen låg det ein tom kleshengar. Då bestemte May-Helen Lødemel Flaten seg for å snakke til mannen. Ho hadde også etter kvart fått selskap av Elisabeth Gamlem Lødemel.

Reiv opp døraMannen sette seg først inn i bilen og smelte att døra, men May-Helen Lødemel Flaten ville ikkje gje seg, og reiv opp bildøra igjen. Etter kvart som mannen vart konfrontert med den tomme kleshengaren og stadige oppmodingar om å ta av seg ytterjakka, gav han seg. Under si eiga jakke hadde han ei vårjakke frå butikken, med prislapp og det heile hengande på. – Eg fekk jakka tilbake, og mannen var full av «sorry, sorry», seier butikkeigaren, som fekk teke bilnummer og meldt saka. – Det er viktig å melde, sjølv om det er snakk om «lite». Det kan verke førebyggjande, seier ho. Fann stolen bilEirik Krossen ved Stryn og Hornindal lensmannskontor seier politiet hadde fått såpass med opplysingar i saka at dei fekk gå til ransaking av ein bustad ein stad på Sunnmøre. – Det resulterte ikkje i så mykje i saka frå Hornindal, bortsett frå at vi har kome i kontakt med dei mistenkte, som vil bli avhøyrde vidare. Men ein annan person på bustaden vart knytt opp mot ein bil som var etterlyst, ein leigebil som har vore meldt stolen. Bilen er funnen og den saka kan reknast som oppklara, seier Krossen.