Det bognar av bilinteresserte folk under Motorfestivalen i Stryn, så ein betre plass å vise seg fram på gateplan skal ein leite lenge etter. Uansett skal dei tre lokale bilforhandlarane i Stryn vere til stades med nypolerte eksemplar av nye modellar frå sine respektive fabrikat.
– Motorfestivalen er veldig viktig for oss og vi gler oss til å vise oss fram for folkemengdene. Dessutan kan eg garantere at det vert sol under Motorfestivalen i år, seier Einar Fredheim ved Toyota Nordfjord i Stryn.
I høve førehandsomtalen stiller han i den heilelektriske Toyota BZ4X.
Bilar på lager i år
– Vi har alltid vore med på denne festivalen fordi det er ein viktig arena. Det som skil seg mest ut i år i forhold til i fjor, er at vi har bilar på lager som ein kan levere omgåande eller på kort tid. I fjor handla det om å setje seg opp på ei venteliste med lang ventetid. Heldigvis er situasjonen endra no, seier Rolf Langeset og Knud Frausing ved Stryn Mek. Verkstad AS.
Noko anna som er nytt for bilforhandlaren på Langesethøgda, er at dei skal vise fram eit ekstra bilmerke i år.
– I tillegg til Subaru og Ford, vil vi også få vise fram den nye el-suven frå JAC, seier Frausing som stiller i ein Ford Mustang Mach E GT.
– Det handlar om elbil
Konkurrenten nede i sentrum er på plass i ein elektrisk Wolkswagen ID Buzz.
– For oss er det elbil det handlar om, spesielt på personbilmarknaden. Det viktigaste er å få vist fram utvalet av både personbilar og nyttekøyretøy, så kan det jo bli eit og anna sal også. Vi selde bil på standen under Motorfestivalen i fjor, fortel Jan Karadas ved Volkswagen – Skoda- og Audiforhandlaren Berge & Co si avdeling i Stryn.