Snøveret skapte ekstra utfordringar for dei 31 deltakarane i Nakkjen Ned torsdag. Det var vanskelege forhold under rennet, med dårleg sikt og føre.

- Det vart svært lita sikt på toppen, men likevel var det ein god gjeng som gjorde seg klare til start, seier rennleiar Oddvin Myklebust i IL Veten. Han var blant dei spreke deltakarane som stabba seg opp på Bergsetnakkjen.

Og den aller raskaste som rende ned til Nordfjord Fritidssenter var frå arrangørklubben. Herreklassen vart nemleg vunnen av Mathias Hagen frå IL Veten, med raskaste tida 04.53.

- Det var nok dei vanskelegaste forholda eg har hatt dei åra eg har vore med. Dårleg sikt og litt laussnø i løypa gjorde at ein måtte konsentrere seg ekstra mykje for å halde seg på beina, seier Mathias Hagen.

Kristi Bergset frå IL Veten var best i kvinneklassen, og gjekk i mål til tida 05.48. Begge deltok i open/randonee-klassen. Anders Bergset var raskaste telemarkløpar, medan Thea S. Bergset vann på snøfjøl.

Trym Dalset Lødøen frå Haugen IL var best i open randone gutar 13-16 år i år som i fjor. Og den første som passerte målstreken,  med nest beste tid for dagen med 05.06.

- Det gjekk ganske bra å renne ned, men det var litt dårleg sikt på toppen, seier ein fornøgd alpinist.

Blant deltakarane som kom seg ned, var det mange som hadde hatt ein utfordrande tur i snøveret. Dårleg sikt, eit par fall og turar utanom traseen var nokre av erfaringane som vart diskutert etter løpet.

I MiniNakkjen Ned gjennomførte 20 born kort eller lang løype.

Mathias Hagen var raskast gut ned i snøføyka og vann herreklassen, medan Kristi Bergset vann dameklassen.