Førstkomande søndag inviterer Stryn Fotball til Kongleriket miniputt-turnering, som går i regi av Sogn og Fjordane Fotballkrets. Temaet for denne tredje runden er « Barn hjelper barn».

Sidan 2011 har miniputtane i fylket, via Kongleriket Miniputt, vore engasjert i bistandsprosjektet «Barn hjelper Barn». Med små aktivitetar som kakesal, tombola, flaskepanting og konkurransar, har miniputtar med foreldre/føresette samla inn over 150.000 kroner til prosjektet som er i regi av Norges Fotballforbund og FFAV (Football For All In Vietnam) med støtte av norsk UD.

Prosjektet gir barn i Hue i Vietnam mulegheit til å spele fotball og leike i områder som er rydda fri for miner. I dag er det oppretta 171 klubbar og meir enn 17.000 born har fått mulegheit til å leike i trygge omgjevnader. Klubbane er oppretta gjennom skulane, og for at skulane skal få støtte må visse kriterier vere oppfylte.

Evy M. Rossetvik i Stryn Fotball håpar på stor oppslutnad om arrangementet, slik at hjelpa til Vietnam blir størst muleg. Ho håpar også på mange mål.

- Det blir betalt 1 krone per mål som blir scora på turneringa, i tillegg arrangerer Stryn Fotball loppemarknad til inntekt for barn i Vietnam. 1.- og 3.- klassingane som deltek på turneringa blir oppfordra til å gje av leikene sine som lopper, seier Rossetvik.