Fjordingen er i gang med å planlegge den årlege sommaravisa. Dette er ei avis som blir spreidd langt vidare enn den vanlege Fjordingen, og som har som mål å syne fram smått og stort av opplevingsmoglegheiter, attraksjonar og arrangement i Stryn og Hornindal.

– Mykje av det vi skriv om i denne avisa er meir eller mindre faste postar frå år til år. Vetestova, Tvinnefossen, Briksdalen, Kulturdagane i Hornindal, Oldedagane, Sommardagane i Utvik og ei lang rekkje andre attraksjonar og arrangement har eksistert like lenge -og lenger, enn det avisa har eksistert, og høyrer naturleg med her. Men så kjem det stadig nye ting til, og som kanskje ikkje vi alltid klarar å fange opp, seier Thomas Thaule og Roy Aron B. Myklebust.

Det er dei som har jobben med å planlegge årets utgåve, og som helsar tips frå innbyggjarane hjarteleg velkomne.

– Men ikkje vent for lenge. I midten av juni går avisa i trykken, og vi må planlegge innhaldet i god tid før dette. Ingen tips for store, ingen tips for små, seier Thaule.

Avisa kjem ut 21.juni og har fokus på det som skjer fram til august-september. Avisa har eit opplag på ca. 30.000.