Mange er uroa for viltpåkøyrslar

Heile 72 prosent av folk i distrikta er bekymra for å møte vilt på vegen når dei er ute og køyrer bil, viser tal frå NAFs Trafikantbarometer 2023.

Elgpåkøyrslar får ofte store konsekvensar og kan gjere stor skade på både bil, sjåfør og passasjer. Ta fareskilta på alvor, oppfordrar NAF. Foto: Gorm Kallestad / NTB / NPK

Førre vintersesong blei over 9000 hjortevilt påkøyrde av køyretøy.

– No kjem kulda og viltet trekkjer meir. Spesielt i distrikta er folk redde for å køyre på vilt, seier rådgivar Jan Harry Svendsen i NAF i ei pressemelding.

– Om vinteren er risikoen for å møte vilt spesielt stor. Viltet trekkjer meir i kulda, og salt på vegane kan føre til at dei trekkjer ned på veg for å sleikje salt, seier Svendsen.

Mange stadar er viltfaren skilta. Det er viktig å følgje med på skilta og redusere farten når du køyrer inn i eit område med viltfare.

NAF tilrår også å dempe lysstyrken på dei mange skjermane som er i moderne bilar.