Under helgas norgescuprenn i skiskyting på Ullsheim fann vi tre generasjonar Gjørven, og alle hadde sine roller å fylle.
Yngstemann Jarle Midthjell Gjørven var den som tok seg av skigåinga og skytinga. Pappa Jan Egil Gjørven stilte som vanleg opp i arrangørstaben som funksjonær, og var standplassjef. Medan farfar Johan tok seg av heiinga på stadion. Han trakka ivrig mellom standplass og løypene, speida etter barnebarnet og gav nokre heiarop på vegen.
- Det er klart det er kjekt å ha folk som bryr seg, seier Jarle Midthjell Gjørven. Han set pris på ein familie som følger med, og ein sportsinteressert bestefar.
- På ein skala frå ein til ti, så er han nok ein åttar når det gjelde interessa for sport, smiler Midthjell Gjørven.