Nokre tok påskeferie allereie til palmehelga, for andre startar påska i dag eller i morgon. Heldigast av alle er skuleelevar og lærarar som har ti samanhengjande dagar fri.

Om vi har nokre få eller mange dagar fri, er påska uansett tid for avslapping og friluftsaktivitetar saman med familie, slekt og vener. Stryn og Hornindal har mange gode tilbod for dei som likar å vere aktive. Difor kjem også mange utflytta heim for å ta i bruk skiløyper og skisentra, samt treffe kjende og kjære.

Fridagane vi går inn i er gitt oss fordi vi feirar ei kyrkjeleg høgtid. Påskebodskapen frå fortviling langfredag til glede og optimisme 1. påskedag er som ei kriminalsak med best tenkjelege utfall. Det er verdt å ha med seg, og er fullt mogleg å kombinere med hyttekos og skigåing. Både i Stryn og Hornindal flyttar kyrkja ut i naturen i form av friluftsgudstenester skjærtorsdag. Gode tradisjonar det er viktig å støtte opp om.

Regionen har ikkje mindre enn tre vinteralpinanlegg, eitt på Utvikfjellet, eitt i Stryn og eitt i Hornindal. I tillegg vil også skitrekket på Grotli gå i påska. Rett ved alle alpinanlegga ligg også flotte langrennsløyper og ventar på å bli brukt. Det same gjer det mange andre stader, blant anna på Nordsida i Stryn.

Skianlegga i indre Nordfjord er populære og har alle det til felles at dei trekkjer til seg gjester også frå nabokommunar og nabofylke. Det betyr at kvalitetane vert sett pris på.

Oppmodinga for påska er klar: Bruk fridagane til gode aktivitetar, saman med dei du er glad i. Og stikk innom friluftsgudstenesta i nærområdet. Då får du påfyll for både kropp og sjel, i Guds naturkatedral.

God påske!

Bengt Flaten

ansvarleg redaktør