I dag hadde skiskyttarherrane pressekonferanse før normaldistansen torsdag. Brørne Bø, Emil Hegle Svendsen og Ole Einar Bjørndalen er ikkje uventa dei fire som skal gå.

Og det var ein avslappa, men like fullt offensiv kvartett som møtte media.

- Det har vore godt med fri, seier Johannes Thingnes Bø, og fortel at gårsdagen og mesteparten av tysdagen har gått med til avslapping. Han er likevel byrja å innstille seg på den krevjande 20-kilometeren om to dagar.

- Eg føler at eg har riktig tenning inn mot løpet, seier han.

Bror Tarjei var også i godt lune og verkar for å ha rista av seg skuffelsen etter dei to første individuelle renna.

- Eg snudde tendensen litt og gjorde ein bra jaktstart, og fekk litt sjølvtillit på den. Eg er revansjesugen, men den må ikkje ta overhand, uttalte Tarjei på pressekonferansen.

Noko av årsaken til den dårlege sprinten som enda i 54. plass, meiner han kan tilskrivast mixed-stafetten. Han var svært sjølvkritisk etter ankeretappen der det vart tre ekstraskot på den liggjande serien, og sa mellom anna "Sorry Norge" då NRK intervjua han etterpå.

- Eg var ikkje nøgd etter stafetten og drog nok med meg noko av frustrasjonen og var ikkje heilt på plass, seier Tarjei.

Han håpar og trur på eit godt resultat, men held Svendsen som den største favoritten mellom dei norske.