30.000 menneske heia dei norske skiskyttargutane fram i Holmenkollen i dag, og minst like mange var på plass då dei tok i mot gullmedaljane på Universitetsplassen laurdag kveld.

- Å vinne gullmedalje på heimebane er det største eg kjem til å oppleve, sa Johannes Thingnes Bø etter medaljeseremonien. Det er utruleg å stå her og sjå utover folkemengda, det er jo kø heilt til Stortinget!

Det var ei enorm folkemengd som hadde samla seg i Oslo sentrum. Gullgutane vart hylla med norske flagg, song og gledesrop. Stemninga var magisk. Ikkje rart det var ein oppglødd Thingnes Bø Fjordingen trefte etter seremonien.

- Det her er fantastisk deilig. Det er så kjekt at vi lukkast som lag! Vi trenar hardt heile året, og vi har eit heilt land som heiar oss fram, då er det viktig at vi greier å prestere. Det er så viktig at vi klarte dette, sa han.

Johannes er overtydd om at dagens stafett er det viktigaste løpet i hans liv.

- Det er veldig, veldig kjekt at eg får oppleve dette, gjentek han fleire gongar.

Storebror Tarjei Bø var også i ekstase då han for forbi Fjordingen.

- Du må helse alle heime! Tusen takk skal de ha! ropte han i forbifarta.