– Det er ein trend på sosiale media som går på å tenne på ting i nærleiken av skular og leggje ut video og bilde. Difor har vi auka patruljering rundt skular i kommunen, seier Lise Brendefur Halnes, politibetjent ved Stryn politistasjon.
– Tysdag kom vi over eit lite bål 30 cm frå veggen på ein skule i Stryn kommune, og bålet brann. Vi kom så i kontakt med ungdomar som erkjente at dei hadde gjort dette. Det er oppretta sak som følgje av hendinga, seier Brendefur Halnes.
– Det gjekk heldigvis bra denne gongen, men det er stort farepotensial ved å tenne bål tett inntil husvegg. Det heile kan starte uskuldig, men så kjem ting ut av kontroll. Det har vore brannar både på skular, barnehagar og institusjonar i landet den siste tida, seier politibetjenten.
Ho seier politiet oppfordrar foreldre om å snakke med ungdomen om kva som rører seg på sosiale media og kva dei sjølv bidreg til å leggje ut.
– Det er svært uheldig om dette er ein trend som får spreie seg i vårt område. Difor går vi ut med denne episoden, og har auka fokus ved jamnleg patruljering innom alle skular i kommunen, seier Brendefur Halnes.
For ikkje å identifisere ungdomen som har tilstått forholdet, ønskjer ikkje politiet gå ut med kva skule hendinga skjedde ved.