– Ein kjende litt ekstra på det i starten. Sjølv om vi konstruerer store bygg der feil kan gi endå større følgjer, er det noko med ei vogn med folk som heng og dinglar oppe i lufta, seier Oddvin Myklebust.
Ingeniøren, busett på Ulvedal, jobbar i eidaverksemda Nordplan og leier bedrifta sitt engasjement i Hoven Loen. Dei har konstruert dei to stasjonane og installasjonane som bind pendelbana saman frå fjord til fjell.
– Mange trur nok at dette i stor grad er ein ferdigpakke frå taubaneleverandøren i Sveits, men det er det altså ikkje, seier Myklebust. Han har teke med lokalavisa på besøk til dei to stasjonane, og forklarar engasjert om arbeidet som ligg bak det vi ser- og ikkje minst kva krefter som er i sving. Det er solide betong- og stålkonstruksjonar som er teke i bruk. Og fundamenta til mastra framme på pynten er forankra med ni fjellanker som går 12 meter ned i fjellet.
– Og bak i stasjonen er det eit heilt rom fyllt med steinmasse som skal skape motvekt, fortel konstruktøren.
Stål frå Stryvo
Sidan det ikkje finst liknande pendelbaneanlegg i Norge måtte dei til Engelberg for å finne referanseprosjekt.
– Men mange av desse var av eldre dato og mykje av dei flotte installasjonane var gøymt vekk, fortel Myklebust. Men ein stasjon bygd i 2009 gav inspirasjon til dei to bygningane i Loen. Her er det lagt vekt på opne rom, mykje glas og stilreint konstruksjonsdesign. Med unntak av stålkonstruksjonane i mastra, og det som direkte er ein del av av sjølve taubana, er alt av stål levert av strynebedrifta Stryvo.
– Dette er ein stor jobb. Vi har levert tilsvarande 30 tonn til toppstasjonen, 25 tonn til fjordstasjonen og med restaurantbygget er vi oppe i 100 tonn, fortel Frode Nedreberg frå Stryvo. I tillegg til stål og betong, er det brukt glas frå Bolseth Glass på Sandane og massivtre frå Luster.
Tidkrevjande prosjekt
Myklebust legg ikkje skjul på at Hoven Loen er eit prestisjeprosjekt for bedrifta.
– Vi trudde vel i utgangspunktet at dette var ein jobb for storleikar som Norconsult eller andre, seier han. Nybrotsarbeid kombinert med motivasjonen for å vise at ein maktar slike prosjekt, har difor resultert i ein enorm arbeidsinnsats frå Nordplan.
– Vi er svært takksame for at byggherren har valt å nytte seg av lokal kompetanse, og på den måten bidreg til å løfte fram og utvikle spennande arbeidsplassar, seier Myklebust.
– Og det er godt å sjå at det meste går bra og det blir levert eit svært godt handverk frå samtlege entreprenørar.