Under formannskapsmøtet førre veke orienterte Sven Flo om frustrasjonen som er knytt til manglande utvikling i Arena Stryn-prosjektet.
– Eg kan seie at frustrasjonsnivået er oppunder taket i idrettslaget. Årsaka er at administrasjonen har kome med innspel om at faglege vurderingar tilseier at det å blande idrett og leilegheiter er ei dårleg løysing, innleia Flo.
– Full kollisjon
Flo la til grunn at Arenaprosjektet har søkt prosjektmidlar til fylkeskommunen som på si side vil ta stilling til dette i år.
– Signala frå departement til krins er positive. Samstundes har vi sett av fem millionar kroner i budsjettet til dette prosjektet. Fleire sit å ventar på framdrift, mellom andre Gym Stryn, sa Flo.
Ordføraren beskriv situasjonen mellom prosjektet og administrasjonen i kommunen som ein kollisjon.
– Difor er det viktig å få lufta dette no, sa Flo som spelte ballen vidare til kommunalsjef Jan Flore for ei utgreiing om kvifor utviklinga har stoppa opp.
Støy og lysforureining
– Dette er ikkje ei enkel sak, for alle er positive til Arena Stryn og det er ingen som motarbeider dette prosjektet, innleia Flore.
Han seier diskusjonstemaet utelukkande er bustadane.
– Bustadar er privatiserande og aktivitetane på anlegget utgjer mykje støy og flomlyset skapar lysforureining til bustadane, sa Flore.
Han viste til folkehelseavdelinga og seier at bustadar er ei dårleg løysing i eit slikt prosjekt.
– Dette er og den faglege vurderinga frå administrasjonen. Utvalet får seie ja eller nei til planoppstart og vidare handsaming. Det må og bli rydda opp i fleire gamle avtalar knytt til området, sa Flore.
Saka skal opp i teknisk utval torsdag 1. februar. Tilrådinga frå rådmanne er følgande;
- Det vert ikkje tilrådd reguleringsendring/omregulering til bustader i 2. og 3. etasje i Arena Stryn – bygget.