Veten idrettslag, Sølvberg Snøservice og Naturleg Aktiv AS er veldig skuffa over at Stryn kommune vedtok å utelate Nordfjord Fritidssenter og berre søke inn sommarskisenteret som kandidat for catskiing i Stryn.
– Vi er forundra og skuffa over at kommunen ikkje gjer det dei kan for oss når det dukkar opp ein slik moglegheit, seier Oddvin Myklebust på vegne av senteret.
– Ikkje kommunen som burde gjere valet
Myklebust er samd i at Stryn Sommerski er ein sterk kandidat, men kan ikkje forstå kvifor dei sjølve ikkje er med.
– Kommunen burde meldt på begge med sommarskisenteret som høgste prioritet. Det burde vere direktoratet som eventuelt gjorde valet om å utelate oss, ikkje vår eiga kommune, seier Myklebust.
Han fortel om ein intens kamp for å halde liv i anlegga. Catskiing ville difor betydd enormt mykje for alle knytt til fritidssenteret.
– Difor kjennest det veldig demotiverande å oppleve motvilje frå kommunen i ei viktig sak, seier han.
Plan- og næringssjef Geirmund Dvergsdal argumenterte for at Nordfjord Fritidssenter ikkje innfridde krava.
– Eit kriterium er at eit slikt tilbod skal vere i forbindelse med eksisterande skiheisanlegg. Vangen innfrir ikkje dette kravet og fell difor utanfor, sa Dvergsdal til formannskapet som samrøystes gjekk inn for å satse på eitt kort; Stryn Sommerski.
– Vi oppfyller krav og kriterium
Olav Sølvberg meiner vedtaket er gjort på feil grunnlag.
Han viser til at det har blitt betalt kontingent til Norske Skiheisars Foreining i ei årrekkje.
– Vi har hatt ønske om eit slikt tilbod i 20 år. Når sjansen endeleg kjem, så blir vi svikta. Eg er så såra og vonbroten at eg ikkje finn ord, seier Nyberg.
Han meiner kommunen uansett burde søkt inn begge.
– Det er kommunen som får tilbodet, ikkje anlegget, poengterer han.