Stryningen Helge Sunde, nyleg å sjå i beste sendetid som kapellmeister og arrangør for storbandkvelden i "Stjernekamp", skal komponere opera. Nærare bestemt skal han skrive musikken til Opera Nordfjord si store oppsetjing neste haust, ein opera om sildeventyret på 50-talet, med Måløy som utgangspunkt. Jostein Fretland Avdem, som skreiv om Bellini-operaen Il Puritani til nynorsk, skal stå for teksten.
- Det stemmer: No blir det sild på operaen. Frå Carmen til Barmen! seier Sunde, på spørsmål frå Fjordingen om det er slik at han skal bli operakomponist.
Det er ikkje første gongen stryningar er sentrale når det blir komponert eit bestillingsverk for Opera Nordfjord. Tidlegare har det vore skrive opera om den legendariske fotbalkampen Norge-Brasil, der opptil fleire Floarar var viktige aktørar. - Egentlig hadde det vel vore meir logisk om eg hadde laga fotballoperaen, seier Helge Sunde.
- Eg fann tross alt opp flopasninga ved ein serie uheldige sleivspark tidleg på åttitalet!
Når det er sagt, skundar han seg å legge til at når sjansen byr seg til å svi av Måløy med fullt orkesterakkompagnement og bygge byen opp igjen sild for sild, gate for gate, utover femtitalet til smektande tonar, då slår ein til.
- Eg trur det blir vel så kjekt, smiler han lurt frå hytta på Tonningsetra. Der skal han forskanse seg og skrive opera dei to neste åra, i følge han sjølv. Opera med sild i sentrum.