Ei undersøking viser at over 20.000 hytter i Norge ikkje har brannslokkeutstyr. Dette er ein av årsakene til at Stryn brannvern har fokus på forebygging av hyttebrannar.
I samarbeid med forsikringsselskapet Tryg, Norsk brannvernforening og Direktoratet for samfunnstryggleik og beredskap, står det lokale brannvernet bak ein kampanje retta mot hyttefolket denne påska.
- At så mange hytter ikkje har slokkeutstyr er alarmerande. Alle hytter skal være utstyrt med minst eit godkjent brannslokkeapparat eller ein husbrannslange, i tillegg til ein røykvarslar etter lovverket, seier brannsjef Jarle Dragesæt i Stryn.
Ei undersøking om branntryggleik på hytta vart gjennomført i februar i 2014. 1300 hytteeigarar og brukarar frå heile landet deltok i undersøkinga, som mellom anna syner at fem prosent av alle hytter i landet ikkje har brannslokkeutstyr.
I påska skal brannvesenet sine representantar ut å treffe hyttefolk for ein hyggeleg prat om branntryggleik. Dei vil vere til stades på nokre av parkeringsplassane ved dei store hyttefelta i indre Nordfjord. Då vil dei også dele ut ei «minihytte» som viser gode brannforebyggande råd. Denne minihytta blir delt ut gratis, og skal hengast opp ein stad på hytta. I minihytta er det også eit batterimagasin og eit røykvarslerbatteri. Her kan ein alltid ha eit eller fleire ekstra røykvarslerbatteri tilgjengeleg, dersom ein treng å byte.
-Vi håper å treffe mange hyttefolk på denne måten. Om eigarar og brukarar av hytter gir branntryggleiken den merksemnda den fortener, kan vi kanskje unngå tragiske hyttebrannar i vårt område, seier brannsjef Dragesæt.
Kampanjen blir utført av brannvernet i dei fleste store hyttekommunar.
Overslag syner at verdier for over 330 millioner kroner gjekk tapt i hyttebrannar sist år.
Feil montering, mangelfullt vedlikehald og feil bruk av eldstad er den vanlegaste brannårsaka.
Handverksmessig eigeninnsats er normalt større på hytter enn i bustadar. Dette kan gi større fare for brann.
Mange hytter ligg utanfor allfarveg, noko som ofte betyr lengre utrykningstid for brannvernet til ei hytte enn til ein bustad.
Alle hytter skal ha minst ein fungerande røykvarslar, i tillegg til eit godkjent brannslokkeapparat eller ein husbrannslange. På hytta må ein sjølve vere førebudde på å slokke ein eventuell brann.
Sjekkliste for branntryggleik på hytta:
Sjekk røykvarslar kvar gong de tek i bruk hytta.
Test røykvarslarar også ein gong i året med røyk.
Byt batteri ved behov, minimum ein gong per år.
Gå aldri frå levande lys.
Ikkje bruk peis/ovn som tørkestativ.
Sørg for å handtere oskeavfall på ein forsvarleg måte.
