Då vossingen Lars Erik Skjervheim kryssa mållinja i ettermiddag, var han den første i historia som kunne smykke seg med tittelen norgesmeister i randonee. Skjervheim fekk også kongepokal for prestasjonen. I kvinneklassen var det Hildegunn Gjertrud Hovdenak som var raskast.
Omlag 35 løparar stilte til start i norgesmeisterskapen som hadde start og innkomst ved Hornindal skisenter. Løypa gjekk først til Høgenibba, deretter nedkøyring til Hingardsvatnet før ny stigning opp til Lisjenibba. Frå der var det full speed ned til mål. Herrane måtte gjennom ein ekstra runde frå vatnet og til Høgenibba før turen gjekk vidare til Lisjenibba.
Vinnartida var på 1.11.40 i herreklassen og 1.06.41 i kvinneklassen.